Úrslit frá fyrsta bikarmótinu

Í kvöld fór fram fyrsta svigmót vetrarins í bikarmótaröð Skíðasambands Íslands. Mótið fór fram í Hlíðarfjalli við fínar aðstæður, snjórinn var vel pakkaður en þó mynduðust smá spor í brautinni. Á tímabili var smá þoka í efri part brautarinnar en þegar leið á kvöldið var skyggni orðið gott. Erla Ásgeirsdóttir vann kvennaflokkinn og lagði grunninn að sigrinum með flottri fyrri ferð, í öðru sæti varð Katla Dagbjartsdóttir en hún er á sínu fyrsta ári í fullorðinsflokki og í þriðja sæti endaði Hólmfríður Dóra Friðgeirsdóttir. Í karlaflokknum sigraði landsliðsmaðurinn Sturla Snær Snorrason, en eins og hjá Erlu átti hann góða fyrri ferð. Í næstu tveimur sætum komu fyrrum landsliðsmennirnir þeir Magnús Finnsson og Einar Kristinn Kristgeirsson. Í fyrrmálið fer svo fram stórsvigsmót og seinni partinn á morgun verður annað svigmót, það er þó ekki bikarmót, einungis ENL FIS mót. 

Úrslit úr kvennaflokki má sjá hér að neðan.

Úrslit úr karlaflokknum má sjá hér að neðan.