Helga María sigrar á fyrsta móti vetrarins!

Fyrir 13 mánuðum síðan lenti Helga María Vilhjálmsdóttir, A-landsliðskona í alpagreinum, í því að slíta krossband í hné. Við tók erfiður tími, aðgerð og enduræfingin og að lokum uppbyggging fyrir komandi vetur. Fyrir um fjórum vikum síðan steig hún aftur á skíði og hóf æfingar. Í dag keppti hún svo á sínu fyrsta móti eftir, eins og áður segir, 13 mánuði en keppt var í svig sem fór fram í Sugarbush í Banadríkjunum. Helga María gerði sér lítið fyrir og sigraði mótið og það með miklum yfirburðum en hún var 2,4 sek á undan næsta keppenda. Fyrir mótið fékk Helga María 41.59 FIS punkta sem er aðeins frá hennar punktastöðu á heimslistanum en þar er hún með 34.69 FIS punkta.

Helga María var ekki eini Íslendingurinn á mótinu því þrír aðrir kvennkynskeppendur voru með í mótinu. Freydís Halla Einarsdóttir náði ekki að ljúka seinni ferð en eftir fyrri ferðina var hún með besta tímann, 44/100 á undan Helgu Maríu sem var önnur. Andrea Björk Birkisdóttir endaði í 7.sæti og fékk 78.52 FIS punkta. Íris Lorange Káradóttir gerði ógilt í seinni ferðinni.

Öll úrslit úr mótinu má sjá hér. Næstu fjóra daga munu þessir sömu keppendur keppa á tveimur svigmótum og tveimur stórsvigsmótum í Sunday River, Bandaríkjunum.