Flott byrjun í Evrópubikar - Marinó Kristjánsson í 13.sæti

Fyrsta Evrópubikarmót vetrarins á snjóbrettum fór fram í dag. Mótið er haldið í SnowWorld skíðahúsinu í Landgraaf í Hollandi. Líkt og á FIS mótinu í gær tóku allir sex íslensku landsliðsmennirnir þátt og fyrirkomulagið var slopestyle.

Sama fyrirkomulag var í dag eins og á FIS mótinu í gær. Fjórir undanriðlar þar sem fjórir bestu fóru áfram í úrslit, samtals 16 keppendur. Marinó Kristjánsson átti mjög góða ferð í undanriðlinum og náði að vera í efstu fjórum sætinum og komst því í úrslit. Í úrslitinum átti hann góða ferð á railum en náði ekki að fylgja því eftir á pöllunum. Að lokum endaði hann í 13.sæti á sterku Evrópubikarmóti. Þess má geta að Evrópubikarmótaröðin er sú næst sterkasta í heimi innan FIS.

Hinir íslensku keppendurnir voru nokkuð frá því að komast í úrslitin en þeir röðuðu sér í sæti 40 til 61. Alls tóku 72 keppendur þátt í dag.

Eins og áður segir eru þetta fyrstu Evrópubikarmót vetrarins og landsliðið okkar að taka þátt í fyrsta sinn. Að eiga keppenda í efstu 15 sætunum er frábær árangur og vonandi halda strákarnir á sömu braut. Farið verður á tvö önnur mót á mótaröðinni í vetur. Í lok janúar verður farið til Font Romeu í Frakklandi og í mars til Laax í Sviss.

Hér má sjá öll úrslit frá mótinu.